Մեդիագրագիտության շաբաթը «Գլաձորում»

Մեդիագրագիտության շաբաթը «Գլաձորում»

 

ՀՀ Կրթության և գիտության նախարարությունը և Մեդիա նախաձեռնությունների կենտրոնը նոյեմբերի 5-9-ը հայտարարեցին Մեդիագրագիտության կրթական շաբաթ Հայաստանի բոլոր դպրոցներում։ ՅՈՒՆԵՍԿՕ-ի գլխավորությամբ աշխարհի տարբեր երկրներում ամեն տարի նշվում է Մեդիագրագիտության շաբաթը՝ կրթական տարբեր ծրագրերով ու միջոցառումներով։ Մեդիագրագիտությունը մեզ շրջապատող մեդիան ճանաչելու, դրա դերն ու նշանակությունը հասկանալու, տեղեկատվության հսկայական ծավալի մեջ կողմնորոշվելու, վերլուծելու և ստուգելու, մեդիայի գործողություններին արձագանքելու հմտությունների ամբողջությունն է։ Մեդիագրագիտության հիմքում քննադատական մտածողությունն է, որը ձևավորվում է առաջին հերթին հենց դպրոցում։ Այս իսկ պատճառով այս տարի ՀՀ բոլոր դպրոցները հրավիրվեցին միանալու նախաձեռնությանը և հինգ օրերի ընթացքում անցկացնել մեդիագրագիտության թեմաներով բաց դասեր, դիտումներ, քննարկումներ, կրթական խաղերի ժամեր։

Միջոցառմանը միացան նաև գլաձորցիները: «Գլաձորի» քոլեջի դասղեկ, քիմիայի ուսուցչուհի Անահիտ Հովհաննիսյանի նախաձեռնությամբ ուսումնառողները հնարավորություն ունեցան կտրվել դասերից ու առօրյայից՝ ընկղմվելով այլընտրանքային-ինտերակտիվ դասախոսության ու առօրյա դարձած մեդիաիրականության մեջ: Լրագրության՝ ծնունդից մինչև մեր օրերը անցած ճանապարհը հանդիպում-դասախոսության ժամանակ ներկայացրեց համալսարանի շրջանավարտ, լրագրող Էլիզա Հովհաննիսյանը: Թեև միջոցառումը նախատեսված էր բարձրդասարանցիների համար, բայց սիրով ներկա գտնվեցին նաև Երևանի «Գլաձոր» համալսարանի իրավաբանական ֆակուլտետի երկրորդ կուրսի ուսանողները:

Ներկաները դիտեցին Մեդիա նախաձեռնությունների կենտրոնի պատրաստած «Ինչպես վերլուծել տեղեկությունները» տեսաֆիլմը, որը պատմում է թե ինչ բան է մեդիան և ինչ է մեդիագրագիտությունը, տեղեկատվությունը, ինչին է պետք ուշադրություն դարձնել, ինչ դիտել, ընթերցել, լսել և ինչն անտեսել:  Ֆիլմին հետևեցին քննարկումները: Թեև ներկաների մեջ չկային երիտասարդներ, ովքեր իրենց ապագան պատկերացնում են լրագրութան ասպարեզում, բայց, ի ուրախություն կազմակերպիչների, ներկաներից յուրաքանչյուրը պատրաստ էր իր գրագիտությամբ աջակից լինել մեդիաոլորտի առողջացմանը: Զանգվածային լրատվամիջոցների անցած ճանապարը մի քիչ խորթ ու մի քիչ էլ անհասկանալի է էլեկտրոնային դարաշրջանի սերնդի համար, բայց մերօրա էլեկտրոնային լրատվամիջոցները երիտասարդների ուշադրության կենտրոնում են, տրված անաչառ տեղեկատվությունը վերջիններիս համար գովելի, իսկ զազրախոսություններն ու ապատեղեկատվությունը քննադատելի են:

Երիտասարդների հարցերը բազմազան էին, բայց իրենց ուրույն տեղն ունեին իհարկե հայաստանյան հեղափոխության ժամանակ լրատվամիջոցների կատարած աշխատանքին առնչվողները: Ունենալ մեդիագրագետ սերունդ, նույնն է, թե ունենալ ոչ անտարբեր, հասարակական-քաղաքական կյանքի զարգացումներին հետևող, իրականությանը քաջատեղյակ հասարակություն: